Cəmİyyət

Sən də könüllü ol

Sən də könüllü ol
 Gənclərin fərdi inkişafına təkan vermək, onlarda sosial məsuliyyət hissini artırmaq, gəncliyin potensialından xalqın rifahı və ölkəmizin dayanıqlı inkişafı üçün səmərəli istifadə etmək məqsədilə Prezident İlham Əliyev 2020-ci ilin Azərbaycan Respublikasında "Könüllülər ili” elan edilməsi haqqında sərəncam imzalayıb. Sərəncamda qeyd olunur ki, könüllülük insanları vahid niyyət ətrafında birləşdirən, vətəndaş, cəmiyyət və dövlətin birgə fəaliyyətinin ən uğurlu formatıdır. Könüllülük həm də vətənpərvərlik məktəbi, öz xalqına, dövlətinə, milli-mənəvi dəyərlərə bağlılıq və xidmət örnəyidir.
     Tarixi keçmişimiz, zəngin mədəni irsimiz və varisi olduğumuz dəyərlər bizləri könüllü olmağa sövq edir. Könüllülük heç bir qarşılıq gözləmədən dövlətin və cəmiyyətin inkişafında yerinə yetirilən fəaliyyətdir. Könüllülük plansız, məsuliyyət hissi olmadan, istənilən zaman imtina ediləcək bir fəaliyyət kimi qiymətləndirilməməlidir.
     Cəmiyyətin sosial və mənəvi inkişafında könüllülük önəmli yer tutur. Gənclərin bu işdən əldə etdikləri ən böyük qazanc onlara verilən səlahiyyətlərdir. Könüllü olmaqla sosial çevrə qazanır, özünü vacib bir şəxs kimi qiymətləndirir və problemlərin həllində önəmli fikirlər irəli sürürlər.
     Tələbəlik zamanı iş həyatı mövzusunda təcrübəsiz oluruq və təəssüflər olsun ki, bu təcrübəni dərs kitablarından əldə etmək mümkün deyil. Könüllü olaraq çalışdıqda qazanılan təcrübə özünə inam hissi yaradır və bizləri gələcək iş həyatına hazırlayır. Könüllülük fərdin özünü çalışmaq üçün uyğun namizəd olduğunu göstərməyin ən səmərəli yoludur. Bu yolla gənclər gələcək hədəflərini müəyyənləşdirir və sevdikləri işi görürlər. Bir sözlə, könüllülük fəaliyyəti iş həyatında müsbət nəticələrə yol açır.
Könüllülüyün fizioloji və psixoloji sağlamlığın qorunmasında önəmli rolu vardır.
Gənclərimizin könüllü olması gələcəyimiz üçün ümid deməkdir. Könüllülər dövlətimizi və cəmiyyətimizi gözəlləşdirməyə çalışan gizli qəhrəmanlardır. Onlar eyni zamanda digər şəxslərin də könüllü olmasına ilham verirlər.
     Könüllü olmaq üçün böyük ürək sahibi olmaq lazımdır. Bu isə Azərbaycan xalqına xas olan ali dəyərdir. Ölkəmizdə Avroviziya Mahnı Müsabiqəsi, I Avropa Oyunları, "Formula 1” yarışları, IV İslam Həmrəyliyi Oyunları kimi irimiqyaslı beynəlxalq tədbirlərin həyata keçirilməsində gənclərimizin göstərdikləri fəaliyyət bunun bariz nümunəsidir.
     Gəncliyimiz, sizinlə qürur duyuruq! Əminik ki, bu xeyirxah əməllərinizlə daim gözəl gələcək inşa edəcəksiniz.
 
Rüstəmova Günay İslam qızı
Bakı şəhəri Nəsimi rayon sakini

XƏBƏR LENTİ

«    May 2020    »
B.eÇ.aÇC.aC.Ş.B
 123
45678910
11121314151617
18192021222324
25262728293031